മദനിയും സരിതയും എഫ്ബിയില്‍ ഏറ്റുമുട്ടിയാല്‍....

പിഡിപി നേതാവ് അബ്ദുള്‍ നാസര്‍ മദനിയേയും സോളാര്‍ തട്ടിപ്പ് കേസിലെ പ്രതി സരിത എസ് നായരേയും ഒരു തരത്തിലും താരതമ്യം ചെയ്യാന്‍ പറ്റില്ല. പക്ഷേ രണ്ട് പേരും ഏതാണ്ട് ഒരേ സമയത്താണ് സോഷ്യല്‍ മീഡിയയില്‍ സജീവമാകുന്നത്. സോഷ്യല്‍ മീഡിയ രണ്ട് പേരേയും എങ്ങനെ സമീപിക്കുന്നു എന്നാണ് ചോദ്യം.

അബ്ദുള്‍ നാസര്‍ മദനി ഫേസ്ബുക്ക് പേജ് തുടങ്ങിയത് ജൂലായ് 20 ന്. സരിത എസ് നായരുടെ പേജ് തുടങ്ങിയത് ജൂലായ് 23 നും. രണ്ട് പേരും പേജ് തുടങ്ങിയതില്‍ മൂന്ന് ദിവസത്തിന്റെ വ്യത്യാസമുണ്ടെങ്കിലും ലൈക്കുകളുടെ എണ്ണത്തില്‍ സരിത മുന്നേറുകയാണ്.

പേജ് തുടങ്ങി 19 മണിക്കൂര്‍ മാത്രം പിന്നിട്ടപ്പോള്‍ സരിത എസ് നായുടെ ഫേസ്ബുക്ക് പേജ് ലൈക്കുകളുടെ എണ്ണം ഒമ്പതിനായിരം കവിഞ്ഞു. നാല് ദിവസം കൊണ്ട് മദനിയുടെ പേജിന് കിട്ടിയ ലൈക്ക് ഏഴായിരത്തി അഞ്ഞൂറ് തികഞ്ഞിട്ടില്ല.

ഫേസ്ബുക്ക് ലൈക്ക് അല്ല ഒരു വ്യക്തിയുടെ വ്യക്തിത്വം നിര്‍ണയിക്കുന്നത് എന്ന കാര്യം ഇത്തരം ലൈക്കുകളുടെ എണ്ണത്തില്‍ നിന്ന് തന്നെ മനസ്സിലാകും. മദനിയുടെ പേജില്‍ ഇസ്ലാമിനേയും ഗാസയേയും റംസാനെയും കുറിച്ചുള്ള ചര്‍ച്ചകള്‍ക്കാണ് പ്രാധാന്യം. സരിതയുടെ പേജില്‍ ആകെക്കൂടി ഒരു കോമഡി ഷോയുടെ അന്തരീക്ഷമാണ്.

രസകരമായ പല ഫോട്ടോ കമന്റുകളും സരിതയുടെ പേജില്‍ കാണാം. തനിക്ക് സച്ചിനെ അറിയാം എന്ന് സരിത പറയുന്നതാണ് അതില്‍ ഒന്ന്. താഴെ താടിക്ക് കൈവച്ച് നില്‍ക്കുന്ന സച്ചിന്റെ ഫോട്ടോയും ഉണ്ട്. എന്നാല്‍ പല കമന്റുകളും സഭ്യതയുടെ അതിര്‍വരമ്പുകള്‍ ലംഘിക്കുന്നവയും ആണ്.