ശ്വേത ഇനി പൂരപ്പറമ്പില്‍ പ്രസവിയ്ക്കുമോയെന്ന് ശോഭ

കൊച്ചി: ബ്ലെസി സംവിധാനം ചെയ്ത കളിമണ്ണ് എന്ന സിനിമയ്ക്ക് പ്രദര്‍ശനാനുമതി നല്‍കരുതെന്ന് മഹിള മോര്‍ച്ച സംസ്ഥാന പ്രസിഡന്റ് ശോഭ സുരേന്ദ്രന്‍.

മനുഷ്യ സമൂഹം സംരക്ഷിച്ചു വന്ന സ്വകാര്യതയാണു ശ്വേത തകര്‍ത്തത്. അവര്‍ സ്വീകരിച്ചതു മൃഗതുല്യ നിലപാടാണ്. സ്വകാര്യത കവര്‍ന്നെടുത്തു സാമ്പത്തിക നേട്ടത്തിന് ഉപയോഗിച്ച ശ്വേത, സ്ത്രീ സമൂഹത്തിന് അപമാനമാണ്.

ഈ സിനിമ പ്രദര്‍ശിപ്പിക്കാന്‍ അനുമതി നല്‍കിയാല്‍ ശ്വേതമേനോന്‍ അടുത്ത പ്രസവം പൂരപ്പറമ്പില്‍ ടിക്കറ്റ് വച്ച് നടത്തുമോയെന്നും ശോഭാ സുരേന്ദ്രന്‍ ചോദിച്ചു. മാതൃത്വത്തെ അപമാനിക്കുകയാണ് ഈ സിനിമയിലൂടെ സംവിധായകന്‍ ചെയ്തതെന്നും അവര്‍ കുറ്റപ്പെടുത്തി. സിനിമ പ്രദര്‍ശിപ്പിച്ചാല്‍ പ്രവര്‍ത്തകര്‍ തടയുമെന്നു ശോഭ സുരേന്ദ്രന്‍ പറഞ്ഞു.

ഇതോടെ ശ്വേത മേനോനെ നായികയാക്കി ബ്ലെസി സംവിധാനം ചെയ്യുന്ന കളിമണ്ണ് കൂടുതല്‍ വിവാദങ്ങളിലകപ്പെടുകയാണ്. രാഷ്ട്രീയ നേതാക്കളായ ജി കാര്‍ത്തികേയനും ജി സുധാകരനും സെബാസ്റ്റ്യ്ന്‍ പോളും വിമര്‍ശനങ്ങളുമായെത്തിയതോടെയാണ് കളിമണ്ണ് വിവാദത്തിലകപ്പെട്ടത്.

ശ്വേതയുടെ പ്രസവരംഗം ചിത്രീകരിയ്ക്കുന്ന സിനിമ തിയറ്ററില്‍ പ്രദര്‍ശിപ്പിയ്ക്കാന്‍ സമ്മതിയ്ക്കില്ലെന്ന് ഫിലിം എക്‌സിബിറ്റേഴ്‌സ് ഫെഡറേഷനും വ്യക്തമാക്കിയിരുന്നു. അതേസമയം സാങ്കേതികപ്രവര്‍ത്തകരുടെ സംഘടനയായ ഫെഫ്ക്ക ബ്ലെസിയ്ക്കും നായിക ശ്വേത മേനോനും പിന്തുണയുമായി രംഗത്തെത്തിയിട്ടുണ്ട്.