വിശ്വഭാരതിയില് വിദ്യാര്ഥിനിയുടെ അശ്ലീല എംഎംഎസ് പകര്ത്തി
കൊല്ക്കത്ത: സഹപാഠികള് പീഡിപ്പിച്ച് മൊബൈല് ഫോണില് ചിത്രങ്ങളില് പകര്ത്തിയതില് മനംനൊന്ത് വിദ്യാര്ഥിനി വിശ്വഭാരതിയിലെ പഠനം അവസാനിപ്പിച്ചു. വിദ്യാര്ഥികള്ക്ക് പുറമേ അധ്യാപകരുടെ ഭാഗത്ത് നിന്നും മോശമായ പെരുമാറ്റമാണ് ഉണ്ടായതെന്ന് വിദ്യാര്ഥിനിയും അച്ഛനും ആരോപിച്ചു. വിശ്വഭാരതിയിലെ കലാഭവന് വിദ്യാര്ഥിനിയെ അതേ ഡിപ്പാര്ട്ട്മെന്റിലെ മൂന്ന് പേര് ചേര്ന്നാണ് പീഡിപ്പിച്ചത്.
വിശ്വഭാരതിയില് ഞങ്ങള്ക്ക് ഒരു സുരക്ഷിതത്വവും തോന്നുന്നില്ല. പീഡനത്തിന് ഇരയായതിലുള്ള ഒരു സഹതാപവും ഞങ്ങളോട് ആരും കാണിച്ചില്ല. എന്ന് മാത്രമല്ല അന്വേഷണം എന്ന പേരില് വിശ്വഭാരതി അധികൃതര് വളരെ മോശമായാണ് പെരുമാറിയത്. മകളെ പീഡിപ്പിച്ച ആണ്കുട്ടികളെക്കാള് കൂടുതല് അവര് എന്റെ മകളെയാണ് ചോദ്യം ചെയ്തത് - പെണ്കുട്ടിയുടെ അച്ഛന് പറഞ്ഞു.
രബീന്ദ്ര നാഥ ടാഗോറിനോട് ഞങ്ങള്ക്ക് വലിയ ആദരവുണ്ട്. വിശ്വഭാരതിയെ ഒരു ആരാധനാലയം പോലെയാണ് ഞങ്ങള് കാണുന്നത്. എന്നാല് ഇവിടെ സംഭവിച്ച കാര്യം ഓര്ക്കാന് പോലും പറ്റുന്നതല്ല. ഞങ്ങള് വിശ്വഭാരതി വിടുകയാണ്. ഇനി ഇങ്ങോട്ട് തിരിച്ചുവരില്ല. പോലീസില് പരാതിപ്പെടാനും ഞങ്ങള്ക്ക് പറ്റിയില്ല - പഠനം നിര്ത്തി തിരിച്ചുപോകവേ പെണ്കുട്ടിയും അച്ഛനും പറഞ്ഞു.
എന്നാല് വിദ്യാര്ഥിനി വിശ്വഭാരതി വിട്ടു എന്ന വാര്ത്തകള് വൈസ് ചാന്സലര് നിഷേധിച്ചു. വിശ്വഭാരതിയിലെ മൂന്ന് വിദ്യാര്ഥികള് ചേര്ന്ന് സഹപാഠിയെ പീഡിപ്പിക്കുകയും അശ്ലീല എം എം എസ് മൊബൈല് ഫോണില് പകര്ത്തി ബ്ലാക് മെയില് ചെയ്യുകയാണ് എന്നുമാണ് പരാതി. എന്നാല് യൂണിവേഴ്സിറ്റി അധികൃതര് പരാതി മൂടിവെക്കാനാണ് ശ്രമിച്ചത്.