മോദി സ്റ്റൈല്: ബജറ്റ് പ്രഖ്യാപനങ്ങള് 10നകം നടപ്പാക്കും!
ദില്ലി: പൊതുബജറ്റിലെ പ്രധാനപ്പെട്ട പ്രഖ്യാപനങ്ങള് ആഗസ്ത് പത്തിനകം നടപ്പാക്കാന് പ്രധാനമന്ത്രി നരേന്ദ്ര മോദിയുടെ നിര്ദേശം. വിവിധ മന്ത്രാലയങ്ങള്ക്കാണ് പ്രധാനമന്ത്രി ഈ നിര്ദേശം നല്കിയത്. ജൂലൈ പത്തിനാണ് ധനമന്ത്രി അരുണ് ജെയ്റ്റ്ലി മോദി സര്ക്കാരിന്റെ ആദ്യ പൊതുബജറ്റ് അവതരിപ്പിച്ചത്. കാബിനറ്റ് സെക്രട്ടറി അജിത് സേത്താണ് പ്രധാനമന്ത്രിയുടെ നിര്ദേശം മന്ത്രാലയങ്ങള്ക്ക് ഇ മെയിലില് അയച്ചത്.
ആഗസ്ത് 15 ന് സ്വാതന്ത്ര്യദിനത്തില് പ്രധാനമന്ത്രി നരേന്ദ്ര മോദി രാഷ്ട്രത്തെ അഭിസംബോധന ചെയ്യും. മെയ് 26 ന് സത്യപ്രതിജ്ഞ ചെയ്ത ശേഷം മോദി നടത്തുന്ന ആദ്യ പ്രധാനപ്പെട്ട പ്രസംഗമായിരിക്കും ഇത്. ഇതിന് മുമ്പായി ബജറ്റ് പ്രഖ്യാപനങ്ങള് നടപ്പിലാക്കാനാണ് സര്ക്കാര് പരിപാടി. ഇക്കാര്യങ്ങള് മോദിയുടെ പ്രസംഗത്തില് ഉള്പ്പെടുത്തുന്നതിന് വേണ്ടിയാണ് പത്തിന് മുമ്പായി പദ്ധതികള് നടപ്പിലാക്കാന് ആവശ്യപ്പെട്ടിരിക്കുന്നതെന്നും റിപ്പോര്ട്ടുണ്ട്.
ബജറ്റ് പ്രഖ്യാപനങ്ങളുമായി ബന്ധപ്പെട്ട് ഓരോ മന്ത്രാലയത്തിന്റെയും പ്രവര്ത്തനങ്ങള് പ്രധാനമന്ത്രിയുടെ ഓഫീസ് നേരിട്ട് നിരീക്ഷിക്കുന്നുണ്ട്. പ്രഖ്യാപനങ്ങളുടെ നടത്തിപ്പ് വേഗത്തിലാക്കാന് വേണ്ടിയാണ് ഇതെന്നാണ് വിശദീകരണം. ബജറ്റ് പ്രഖ്യാപനങ്ങള് നടപ്പില് വരുത്താനുളള അവസാന തീയതിയായി ആഗസ്ത് പത്താണ് നല്കിയിരിക്കുന്നത് എന്ന് മുതിര്ന്ന നേതാക്കള് പറയുന്നു.
പദ്ധതികള് വേഗത്തില് നടപ്പിലാക്കുക, പരമാവധി സുതാര്യമാക്കുക എന്നതാണ് മോദി സര്ക്കാരിന്റെ പ്രഖ്യാപിത മുദ്രാവാക്യം. ബ്യൂറോക്രസിയുടെ പ്രവര്ത്തനക്ഷമത വര്ദ്ധിപ്പിക്കാനും വിവിധ മന്ത്രാലയങ്ങള് ശ്രദ്ധിക്കുന്നുണ്ട്. ഓഫീസ് സമയം രാവിലെ 9 മുതല് വൈകുന്നേരം അഞ്ച് വരെ നിര്ബന്ധമാക്കിയതും ഇതിന്റെ ഭാഗമായാണ്. സാധാരണ ഗതിയില് ബജറ്റ് പ്രഖ്യാപനങ്ങള് ഒരു വര്ഷം വരെ സമയമെടുത്താണ് പൂര്ത്തിയാക്കാറുള്ളത്.