മൊബൈല്ഫോണ് കിട്ടിയില്ല; 13കാരന് തൂങ്ങിമരിച്ചു
ജയ്പൂര്: മൊബൈല്ഫോണ് വാങ്ങിക്കൊടുക്കാത്തതില് മാതാപിതാക്കളോട് ദേഷ്യപ്പെട്ട് 13 കാരന് ആത്മഹത്യ ചെയ്തു. രാജസ്ഥാനിലെ സുശീല്പുരയിലെ ശിവ്പുര കോളനിയിലാണ് രവികുമാര് എന്ന എട്ടാം ക്ലാസ് വിദ്യാര്ഥി തൂങ്ങിമരിച്ചത്. ക്ലാസില് കൂട്ടുകാര്ക്കെല്ലാം മൊബൈല്ഫോണും കംപ്യൂട്ടറും ഉണ്ടെന്നും തനിക്കും മൊബൈല്ഫോണ് വേണമെന്നും കുട്ടി വീട്ടുകാരോട് ആവശ്യപ്പെട്ടിരുന്നു.
എന്നാല് മൊബൈല്ഫോണ് വാങ്ങിക്കൊടുക്കാതെ അച്ഛനമ്മമാര് കുട്ടിയെ നിര്ബന്ധിച്ച് സ്കൂളിലേക്ക് അയക്കാന് ശ്രമിച്ചു. കഴിഞ്ഞ മൂന്ന് ദിവസമായി രവികുമാര് സ്കൂളില് പോകാതെ വീട്ടിലിരിക്കുകയായിരുന്നു. സ്കൂള് പൂട്ടി എന്ന് പറഞ്ഞാണ് കുട്ടി വീട്ടിലിരുന്നത്. എന്നാല് സ്കൂള് പൂട്ടിയിട്ടില്ല എന്ന് കണ്ടുപിടിച്ച അച്ഛന് വ്യാഴാഴ്ച രാവിലെ രവികുമാറിനെ വിളിച്ചുണര്ത്തി സ്കൂളിലേക്ക് പോകാന് നിര്ബന്ധിച്ചു.
ചായ എടുക്കാന് വേണ്ടി അടുക്കളയിലേക്ക് പോയ രവികുമാര് ബെല്ട്ട് ഉപയോഗിച്ച് തൂങ്ങിമരിക്കുകയായിരുന്നു എന്ന് പോലീസ് പറഞ്ഞു. മൊബൈല്ഫോണും കംപ്യൂട്ടറും വേണം എന്ന് പറഞ്ഞ് രവികുമാര് വീട്ടില് ബഹളം വെക്കാറുണ്ടായിരുന്നത്രെ. എന്നാല് തുന്നല്ക്കാരനായ അച്ഛന് ദിലീപിന് മൊബൈല്ഫോണും കംപ്യൂട്ടറും വാങ്ങാനുള്ള പണമുണ്ടായിരുന്നില്ല.
സുശീല്പുര സര്ക്കാര് സ്കൂളില് എട്ടാം ക്ലാസ് വിദ്യാര്ഥിയാണ് രവികുമാര്. മൊബൈല് ഫോണും കംപ്യൂട്ടറും വാങ്ങിക്കൊടുക്കാതിരുന്നതും സ്കൂളില് പോകാന് നിര്ബന്ധിച്ചതുമാണ് കുട്ടിയെ കൊണ്ട് ഈ കടുംകൈ ചെയ്യിച്ചതെന്നാണ് പോലീസ് പറയുന്നത്.