ആള് മാറി നഗ്നചിത്രം അയച്ചു; മന്ത്രിയുടെ പണി പോയി

ലണ്ടന്‍: സോഷ്യല്‍ നെറ്റ് വര്‍ക്കിംഗ് സൈറ്റില്‍ പരിചയപ്പെട്ട 'സുന്ദരി'ക്ക് നഗ്ന ചിത്രങ്ങള്‍ അയച്ചുകൊടുത്ത മന്ത്രിയുടെ പണി പോയി. 56 കാരനായ മന്ത്രി ചൂടന്‍ ചിത്രങ്ങള്‍ അയച്ചുകൊടുത്തത് ഒരു സ്ത്രീക്ക് പോലുമല്ല എന്നതാണ് ഏറെ രസകരം. സ്ത്രീയാണ് എന്ന് കരുതി ഒരു ഫ്രീലാന്‍സ് പത്രപ്രവര്‍ത്തകനാണ് മന്ത്രി ചിത്രങ്ങള്‍ അയച്ചത്.

ഇംഗ്ലണ്ടിലെ ഡേവിഡ് കാമറൂണ്‍ മന്ത്രിസഭയിലെ അംഗമായ ബ്രൂക്‌സ് ന്യൂമാര്‍ക് എന്ന 56 കാരനാണ് ഭീകരമായ ഈ അക്കിടി പറ്റിയത്. ഫ്രീലാന്‍സ് ജേര്‍ണലിസ്റ്റ് ചിത്രങ്ങള്‍ സണ്‍ഡേ മിററിന് കൈമാറിയെന്നും പത്രത്തില്‍ അച്ചടിച്ചുവരുമെന്നും മനസിലാക്കിയാണ് ബ്രൂക്‌സ് ന്യൂമാര്‍ക് മന്ത്രിസ്ഥാനം രാജിവെച്ചത്. ബ്രൂക്‌സ് ന്യൂമാര്‍കിന്റെ രാജി സ്വീകരിച്ചതായി റിപ്പോര്‍ട്ടുണ്ട്.

ടോറി പബ്ലിക് റിലേഷന്‍ ഉദ്യോഗസ്ഥ എന്ന് സോഷ്യല്‍ നെറ്റ് വര്‍ക്കിംഗ് സൈറ്റില്‍ സ്വയം പരിചയപ്പെടുത്തിയാണ് ഫ്രീലാന്‍സ് ജേര്‍ണലിസ്റ്റ് മന്ത്രിയെ പരിചയപ്പെട്ടത്. പരിചയം ചാറ്റിംഗിലെത്തി. ഇരുവരും ചൂടന്‍ ചാറ്റുകളും ചിത്രങ്ങളും കൈമാറിത്തുടങ്ങി. അപ്പുറത്തുള്ളത് യുവതിയാണ് എന്ന് സ്വപ്‌നം കണ്ട് മന്ത്രി മിക്കവാറും നഗ്നനായി ഒരു ചിത്രം കൊടുത്തു. പകരം സമാനമായ ഒരു ചിത്രം വേണമെന്നും ആവശ്യപ്പെട്ടു.

മന്ത്രിസഭയുടെ ഉയര്‍ന്ന സ്ഥാനങ്ങളില്‍ സ്ത്രീ സാന്നിധ്യമില്ലാത്തതിന്റെ പേരില്‍ വിമര്‍ശിക്കപ്പെടുന്ന ഡേവിഡ് കാമറൂണിനെതിരെ എതിരാളികള്‍ക്ക് കിട്ടിയ ആയുധമായി പുതിയ വിവാദം. ട്വിറ്ററില്‍ 20 കാരിയായ സുന്ദരിയുടെ ചിത്രം വെച്ചാണ് ഫ്രീലാന്‍സ് ജേര്‍ണലിസ്റ്റ് മന്ത്രിയെ വീഴ്ത്തിയത്. വേറെയും എം പിമാര്‍ അശ്ലീല ചാറ്റിംഗില്‍ കുടുങ്ങാന്‍ സാധ്യതയുണ്ട് എന്നാണ് റിപ്പോര്‍ട്ട്