സ്വന്തം പ്രതിമയില്‍ വി എസ് സംതൃപ്തന്‍!

തിരുവനന്തപുരം: മസ്‌ക്കറ്റ് ഹോട്ടലിലെ കോണ്‍ഫറന്‍സ് ഹാളിലേക്ക് പ്രതിപക്ഷ നേതാവ് വി എസ് അച്യുതാനന്ദന്‍ കയറിയത് ഒറ്റയ്ക്കാണ്. രണ്ട് മിനിട്ടിനു ശേഷം കൂടാരത്തിന്റെ കര്‍ട്ടന്‍ നീങ്ങിയപ്പോള്‍ വേദിയില്‍ രണ്ട് വി എസ്!

ഒരാളുടെ മുഖത്ത് അല്പം പുഞ്ചിരി കൂടുതലുണ്ടെന്നതൊഴിച്ചാല്‍ രണ്ടു പേരും ഒരു പോലെയിരിക്കുന്നു. യഥാര്‍ത്ഥ വിഎസ് ആരാണെന്ന് കാഴ്ചക്കാര്‍ സംശയിച്ചു നില്‍ക്കുമ്പോഴാണ് ഒരാളുടെ കൈ പതുക്കെ മറ്റെയാളെ തലോടിയത്.

പ്രശസ്ത മെഴുകു പ്രതിമാ ശില്‍പി സുനില്‍ കണ്ടല്ലൂരാണ് വിഎസ് അച്യുതാനന്ദന്റെ മെഴുക് പ്രതിമ നിര്‍മ്മിച്ചത്. പൂനൈ ലൊണാവാലയിലെ മെഴുക് പ്രതിമാ മ്യൂസിയത്തിന്റെ കേരളത്തിലെ ആദ്യ ശാഖ കൊച്ചിയില്‍ തുടങ്ങുന്നതിന്റെ മുന്നോടിയായാണ് വിഎസിന്റെ പ്രതിമ അനാച്ഛാദനം ചെയ്തത്. അന്തരിച്ച ജസ്റ്റിസ് വി ആര്‍ കൃഷ്ണയ്യരുടെ മെഴുകു പ്രതിമയടക്കം അമ്പതോളം പ്രതിമകളാണ് അവിടെ ഒരുക്കുന്നതെന്ന് സുനില്‍ പറഞ്ഞു.

പ്രതിമ തന്നെ പോലെയാണോ എന്ന് തീരുമാനിക്കേണ്ടത് കാണുന്നവരാണെന്നാണ് വിഎസ് പ്രതിമയെ തൊട്ടുനോക്കിയിട്ട് പറഞ്ഞത്. നല്ല ഛായയുണ്ടെന്ന് കാഴ്ചക്കാര്‍ പറഞ്ഞപ്പോള്‍ താനും അത് അംഗീകരിക്കുന്നെന്നായി വിഎസ്. എല്ലാവരും പറഞ്ഞ സ്ഥിതിയ്ക്ക് ഈ പ്രതിമ തന്റെ തനതു രൂപമായി താനും അംഗീകരിക്കുന്നുവെന്ന് വി എസ് പറഞ്ഞു.