കാണാതായ നടി കൊല്ലപ്പെട്ടെന്ന്‌ സൂചന

മുംബൈ: ദുരൂഹസാഹചര്യത്തില്‍ കാണാതായ മറാത്തി സിനിമാ നടി അല്‍ക പുനേവര്‍ കൊല്ലപ്പെട്ടതായി അന്വേഷണ സംഘത്തിന് സൂചന ലഭിച്ചു. മുംബൈയില്‍ നിന്നും പുനെയിലേക്കുള്ള യാത്രയ്ക്കിടെ 2013 ഡിസംബര്‍ 27 നായിരുന്നു ഇവരെ കാണാതായത്. തുടര്‍ന്ന് പോലീസ് നടത്തിയ അന്വേഷണത്തില്‍ അല്‍കയുടെ കാര്‍ മുംബൈ - പുനെ എക്‌സ്പ്രസ് ഹേവേയിലെ ഒരു കൊക്കയിലേക്ക് മറിഞ്ഞ നിലയില്‍ കണ്ടെത്തിയിരുന്നു.

44 കാരിയായ അല്ക പുനേവാര്‍ കൊല്ലപ്പെട്ടതായി സ്ഥിരീകരിക്കാന്‍ പോലീസ് ഇനിയും തയ്യാറായിട്ടില്ല. അല്‍കയെ കാണാതായി ഒരാഴ്ച പിന്നിട്ടിരിക്കുയാണ.് ഇവരുടെ കാര്‍ കൊക്കയിലേക്ക് മറിഞ്ഞ നിലയില്‍ കണ്ടെത്തിയത് സംഭവത്തില്‍ ദുരൂഹത ഉണ്ടാക്കുന്നുണ്ട്. അല്‍ക കൊല്ലപ്പെട്ടിരിക്കാനുള്ള സാധ്യത തള്ളിക്കളയാനാകില്ല. അന്വേഷണസംഘത്തിന് ഇത് സംബന്ധിച്ച സൂചനകള്‍ ലഭിച്ചിട്ടുണ്ട് - അസിസ്റ്റന്റ് പോലീസ് കമ്മീഷണര്‍ സന്ദീപ് ബുരേവാര്‍ പറഞ്ഞു.

അല്‍ക പുനേവാറിന്റെ ഭര്‍ത്താവ് സഞ്ജയ് പുനേവറിന്റെ പരാതിയില്‍ പോലീസ് മാന്‍ മിസിംഗിനാണ് കേസെടുത്തിട്ടുള്ളത്. കുറച്ചുകൂടി വ്യക്തമായ തെളിവുകള്‍ കിട്ടിയാല്‍ ഐ പി സിയിലെ ബന്ധപ്പെട്ട വകുപ്പുകള്‍ ചേര്‍ത്ത് കേസെടുക്കുമെന്നും അസിസ്റ്റന്റ് പോലീസ് കമ്മീഷണര്‍ പറഞ്ഞു. ബോളിവുഡ് നടിയായിരുന്ന സന്ധ്യാ സിംഗിന്റെ മരണവും സമാനമായ രീതിയിലായിരുന്നു. കാണാതായി ഒരുമാസം കഴിഞ്ഞാണ് സന്ധ്യ സിംഗിനെ കൊല്ലപ്പെട്ട നിലയില്‍ കണ്ടെത്തിയത്.

മറാത്തി സിനിമകളിലെ സ്ഥിരം സാന്നിധ്യമായ അല്‍ക പുനേവാര്‍ ചില ഹിന്ദി ചിത്രങ്ങളിലും അഭിനയിച്ചിട്ടുണ്ട്. ഒരു തീയറ്റര്‍ ഷോയില്‍ പങ്കെടുക്കാന്‍ വേണ്ടി മുംബൈയില്‍ നിന്നും പുനെയിലേക്കുള്ള യാത്രയ്ക്കിടെയാണ് ഇവരെ കാണാതായത്. അല്‍കയുടെ ഭര്‍ത്താവ് സഞ്ജയ് പുനേവാര്‍ അന്വേഷണത്തോട് വേണ്ട രീതിയില്‍ സഹകരിക്കുന്നില്ല എന്നും റിപ്പോര്‍ട്ടുണ്ട്. നേരത്തെ അല്‍കയുടെ ആവശ്യപ്രകാരം താനാണ് താനെ റെയില്‍വേ സ്റ്റേഷനില്‍ കൊണ്ടുവിട്ടതെന്ന് സഞ്ജയ് പോലീസിനോട് പറഞ്ഞിരുന്നു.