കാണാതായ സിനിമാനടി കാമുകനൊപ്പം ചെന്നൈയില്‍

മുംബൈ: ദുരൂഹ സാഹചര്യത്തില്‍ കാണാതായ മറാത്തി നടി അൽക പുനേവറിനെ കാമുകനോടൊപ്പം ചെന്നൈയില്‍ വെച്ച് പിടികൂടി. മുംബൈയില്‍ നിന്നും പുനെയിലേക്കുള്ള യാത്രാമദ്ധ്യേ 2013 ഡിസംബര്‍ 27 നാണ് ഇവരെ കാണാതായത്. കാമുകനൊപ്പം പിടിയിലായ നടിയെ ചെന്നൈ പോലീസ് മുംബൈയില്‍ നിന്നുമെത്തിയ പ്രത്യേക അന്വേഷണ സംഘത്തിന് കൈമാറി.

പോലീസ് സംഘത്തിന്റെ ശ്രദ്ധ തിരിക്കാനായി തെറ്റായ വിവരങ്ങളും തെളിവുകളും സൃഷ്ടിച്ചതിന് മുംബൈ പോലീസ് അല്‍ക പുനേവറിനെതിരെ കേസെടുത്തു. അല്‍ക പുനേവറിനെ കാണാതായ കേസ് അന്വേഷിക്കുന്ന ഖോപ്രി സീനിയര്‍ വനിതാ പോലീസ് ഓഫീസറും മറ്റ് രണ്ട് വനിതാ കോണ്‍സ്റ്റബിള്‍മാരുമാണ് മുംബൈയില്‍ നിന്നും ചെന്നൈയിലെത്തിയത്.

ചെന്നൈ പൂനമല്ലി ഹൈ റോഡിലെ ഒരു ഹോസ്റ്റലില്‍ നിന്നാണ് അല്‍ക പുനേവറിനെയും കാമുകന്‍ അലോക് പലിവാളിനെയും പോലീസ് അറസ്റ്റ് ചെയ്തത്. മുംബൈ പന്‍വേല്‍ സ്വദേശിയാണ് അലോക്. പുനെയിലേക്കുള്ള യാത്രക്കിടെ കാണാതായി എന്ന് തെറ്റിദ്ധരിപ്പിച്ച് അല്‍ക കാമുകന്‍ അലോകിനൊപ്പം ചെന്നൈയിലെത്തി ഹോട്ടലില്‍ മുറിയെടുത്ത് താമസിക്കുകയായിരുന്നു.

അല്‍ക പുനേവറിന്റെ ഫേസ്ബുക്ക് ഫ്രണ്ടാണ് അലോക് എന്നാണ് അന്വേഷണ ഉദ്യോഗസ്ഥര്‍ പറയുന്നത്. ഫ്രണ്ട്ഷിപ്പ് പ്രണയത്തിലെത്തിയതോടെ ഇരുവരും ഒളിച്ചോടാന്‍ തീരുമാനിക്കുകയായിരുന്നു. അന്വേഷിച്ച് വരുന്നവരുടെ ശ്രദ്ധ തിരിക്കാന്‍ വേണ്ടിയാണ് കാര്‍ കൊക്കയിലേക്ക് തള്ളിയിട്ടത്. മറാത്തി നടിയായ അല്‍ കപുനേവര്‍ എന്ന 44 കാരി ഹോളിവുഡ് ചിത്രങ്ങളിലും അഭിനയിച്ചിട്ടുണ്ട്. കൊക്കയില്‍ കാര്‍ മറിഞ്ഞത് കണ്ട പോലീസ് അല്‍ക കൊല്ലപ്പെട്ടു എന്ന നിഗമനത്തിലായിരുന്നു.